Oda kay Juan Bautista

Ni Hidalgo Del Arrabal

Maligayang bati, Juan Bautista!

Pagsilang mo hatid ay pag-asa

Sa mundong balot sa kadiliman

At nasa banig ng karamdaman.

Kina Elisabet at Zacarias

Biyaya ka ng Diyos na mataas;

Sa mga mata ng iyong kapwa

Kasama mo ang Hari ng Awa.

Panawagan mo, magbalik-loob

Bayang sa kasalana'y nasubsob;

Daan ng puso gawing matuwid

Upang kaligtasa'y maihatid.

Tunay ngang maraming nag-akala

Ika'y Poong magbibigay-ginhawa;

Tumanggi ka't 'tinuro sa tanan

Jesu-Kristong kabanalbanalan.

Ligaya ng 'yong kapanganakan

Hanggang ngayon ay nararamdaman

Ng bayang sa Diyos ay naghahangad

At sabik na Kanyang mapatawad.

Tinig mo ay naririnig pa rin

Ng madlang may magandang hangarin;

Nakikibaka sa kasamaan,

Sa pangalan ng katotohanan.

Purihin ka, O San Juan Bautista:

Pinsan ni Kristong Anak ng Ama,

Propeta ng Pangakong Mesiyas,

Isang saksing tapat hanggang wakas!