Sino ba?

Sino ba ang di nangarap na tanggapin?

Ang tanggapin nang buo at walang alinlangan,

Ang magpahayag ng kasalanan,

at di mahusgahan sa nakaraan?

Lahat ng takot at pangamba ay mapapawi

Buhay ay liliwanag,

Sasayaw ang puso, magagalak,

Sapagkat sa wakas ay natagpuan na...

Ang kalayaan ng isip at pag-asa.

Sino ba ang di nangarap na mahalin?

Ang mahalin kapalit ay buhay at pagkatao?

Dalisay at wagas kung ituring ay parang isang ginto...

Sino ba ang di nangarap na mahalin nang buo?

Lahat ng luha mapapawi,

Lahat ng lungkot mapapalitan ng saya,

Sasayaw ang puso, magagalak ...

Sapagkat sa wakas natagpuan na

Ang higit pa sa kayamanan ng buhay.

Sino ba ang di nangarap magmahal?

Kapag natagpuan mo na ito, sino ang magnanais na ito ay magwakas?

Bakit pa nanaiising lumayo sa piling Nya?

Kung tunay na pag-ibig na ang natagpuan sa Kanya?

Lahat ng ito ay maglalaho,

Hungkag at panandalian…

Ngunit ang sa Ama at ni Hesus

Walang maliw, wagas….

Walang hangganan!

(by Grace Madrinan)

Ang Makabagong Daing ni Jesus

Hidalgo Del Arrabal

Bayan Ko,
Ano’ng nagawa Ko’t
Ginaganito n’yo ako?
Ano’ng naging sala Ko?
Sagutin n’yo ako!

Likas-yamang bigay Ko
Di n’yo ginamit nang wasto.
Sa mga likha Ko kayo’y pabaya.
Malalaking baha
Tiyak sa inyo’y pupuksa!

Bayan Ko,
Ano’ng nagawa Ko’t
Ginaganito n’yo ako?
Ano’ng naging sala Ko?
Sagutin n’yo ako!

Mariwasang pamumuhay
Ang ilan sa inyo’y nagpapasasa.
Di alintana ang mga dukha.
Yamang ipinagkatiwala,
Di n’yo madadala sa kabila!

Bayan Ko,
Ano’ng nagawa Ko’t
Ginaganito n’yo ako?
Ano’ng naging sala Ko?
Sagutin n’yo ako!

Puno ang isip n’yo ng kaalaman
Pero ang konsensya’y nasaan?
Magkapera’y mahalaga kahit saan ito makita.
Tusong mga nilalang,
Sa totoo’y mga mangmang!

Bayan Ko,
Ano’ng nagawa Ko’t
Ginaganito n’yo ako?
Ano’ng naging sala Ko?
Sagutin n’yo ako!

Buhay Ko’y ihinga Ko sa inyo.
Ngunit bakit wala nang silbi sa inyo
Mga ipinaglihing ‘wala sa plano’
O kaya’y mga matatandang ‘perwisyo’?
Sa krus Ako’y muli n’yong ipinako!

Bayan Ko,
Ano’ng nagawa Ko’t
Ginaganito n’yo ako?
Ano’ng naging sala Ko?
Sagutin n’yo ako!

Hari Akong nagsisilbi.
Pero mga pinuno n’yo’y
Kung umasta’y mga amo!
Naghihintay sa mga nagmamataas,
Isang matinding pagbagsak!

Bayan Ko,
Ano’ng nagawa Ko’t
Ginaganito n’yo ako?
Ano’ng naging sala Ko?
Sagutin n’yo ako!

Ako ang Katotohanan,
Ngunit kayong mga ‘tagasunod’ Ko’y
Mga sinungaling at nasa dilim!
Takot kayo sa ‘king liwanag
Dahil kasamaan n’yo’y mabubunyag!

Bayan Ko,
Ano’ng nagawa Ko’t
Ginaganito n’yo ako?
Ano’ng naging sala Ko?
Sagutin n’yo ako!

Sarili Kong buhay sa inyo’y inialay
Subalit kayo’y naging makasarili
Sa kapwa’t bayan walang pakialam.
Buhay ay may saysay lamang
Kung ito sa iba’y ilalaan.

Bayan Ko,
Ano’ng nagawa Ko’t
Ginaganito n’yo ako?
Ano’ng naging sala Ko?
Sagutin n’yo ako!