Ang Lihim ni San Jose

Ni Hidalgo Del Arrabal


Itay, paano mo nagawa

Sa panaginip maniwala?

Paano ka nga po nakinig

At sa tukso'y 'di nagpalupig?

Anak, sa Diyos 'ko nagtiwala

Pagsubok 'di 'ko nabahala

Sa Kanya, puso'y laging bukas

Pagpapakumbaba ko'y wagas.

Itay, paano mo hinarap

Mga sakit at paghihirap?

Paano mo po nagampanan

Pagiging ama ng tahanan?

Anak, tapat 'kong nangalaga

Sa Hari at Reyna ng Awa

Tahimik silang inaruga

Sa masama ipinag-adya.

Itay, ituro mo sa amin

Ang nararapat naming gawin

Kay Satanas huwag paalipin

Nais ng Diyos aming tutupdin!

Pagsubok, Pagkakataon

Pagsubok, Pagkakataon

Ni Hidalgo Del Arrabal

Kapag ang mga nasa paligid mo'y di palasimba,

Kapag umuulan o kaya'y sira ang iyong sasakyan,

Kapag kay Father, Brod, o Sis ay di ka nasisiyahan:

Magsisimba ka pa rin ba?

Kung si Kumpare, Kumare o katrabaho'y may Number 2,

Kung nakakabighaning talaga ang ganda ng iyong kapit-bahay,

Kung malayo ka sa iyong asawa o kasintahan:

Mananatili ka pa rin bang tapat sa iyong sinumpaang pangako?

Kapag dasal mo'y tila di pinapakinggan,

Kapag mukhang wa epek ang anumang iyong pinagsisikapan,

Kapag panay negatibo na lang ang nasasagap mong balita:

Magpupursige ka pa rin ba sa iyong mga pangarap?

Kung walang pakain matapos ang padasal,

Kung nawalan ka na ng papel o puwesto,

Kung mga dukha, gusgusi't, mahihina ang lagi mong nakakasalamuha:

Makiisa ka pa rin ba sa iyong grupo?

Ang pananampalataya'y isang regalo.

Nasa atin na kung ito'y ating isasabuhay at pauunlarin.

Makita nawa natin sa likod ng mga pagsubok

Mga pagkakataong ipahayag, "Oo tagasunod ako ni Kristo"!